منیم آنا دیلیم - اینشاء

​

منیم آنا دیلیم - اینشاء

منیم آنا دیلیم! بو، او دیلدیر کی، آنالاریمیز بیزه بئشیک باشیندا حیاتین ان حزین سمفونیسی اولان لایلانی بو دیلده دئمیشدیر، بو، او دیلدیر کی، فضولی عشقی، نسیمی دؤزومو، وورغون شیرینلیگی، اوزئییر دونیاسی بو دیلده ایفاده اولونموش، زامان-زامان قانیمیزا، جانیمیزا هوپموشدور.

آنا دیلی بیزیم موقدس ثروتیمیز، آنامیزین دیلی‌دیر. آنا دیلی عؤمروموزه معنا وئرن، اونو گؤزل‌لشدیرن اخلاق درسلیگی‌دیر. آنا دیلی عادیجه بیر ایفاده دئییل. اورک‌لره حرارت گتیرن، اینسانی اؤز کئچمیشینه باغلایان، گله‌جگه سسله‌ین معنوی خزینه‌دیر. آنا دیلی بیزیم کؤکوموز، میلّی مدنیتیمیز، میلّی اخلاقیمیزدیر. 

 

دیلسیز اینسان سوسوز صحرالارا بنزر. اینسان هله کؤرپه‌ایکن دیلین واسیطه‌سی ایله آنا لایلاسینداکی دوغمالیغی دویور، حیسّ ائدیر، ائشیتدیگی ناغیل‌لارداکی هر سؤزون، هر ایفاده‌نین نئجه سسلندیگینی اؤیرنمگه جهد ائدیر.

منیم آنا دیلیم آذربایجان تورکجه‌سی‌دیر. بو دیل منی دونیایا گتیرن آنامین دیلی‌دیر، اوزرینده بوی آتیب بؤیودوگوم وطنیمین دیلی‌دیر.

آذربایجان تورکجه‌سی‌ هم قودرتلی و گؤزل، هم ده معنالی و شیرین دیلدیر. بو دیل ان مورکّب فیکیرلری ایفاده ائتمگه ان اوبرازلی اپیزودلاری چاتدیرماغا قادیر بیر دیلدیر.

سنی شفق بیلدیم بو جاهاندا من،

بعضاً شیمشک اولوب غضبله چاخدین.

ایلک دفعه دونیایا گؤز آچاندا من.

قلبیمه گونشین اؤزو ایله آخدین

آذربایجان تورکجه‌سی‌ آذربایجان خالقی نین وارلیغی‌دیر. مین ایلدن آرتیق تاریخی اولان بو دیلده نه قدر گؤزل اثرلر یارانمیش، نه قدر حیکمتلی فیکیرلر سؤیلنمیشدیر. آذربایجان تورکجه‌سی‌ اعجازکار بیر دیلدیر. آذربایجان تورکجه‌سی‌ حاقیندا یازیچی میرزه ابراهیموفون فیکری چوخ ماراقلی‌دیر. او یازیر: «‌آذربایجان تورکجه‌سی‌ قانادلی خیال‌لاری، جوشقون احتیراس‌لاری، درین فیکیرلری ایفاده ائده بیلیر. عئینی زاماندا بو دیل گؤزلدیر، جاذیبه‌داردیر، شعرله، آهنگله، موسیقی ایله دولودور».

اینسان حیاتیندا دیل قدر لازیملی، دیل قدر اعجازکار بیر شئی یوخدور. چونکی محض دیلین کؤمگی ایله بیلیک‌لره یییه‌له نیر، اونون واسیطه‌سی ایله اؤز سئوینج و آرزولاریمیزی، سئوگی و محبتیمیزی، غضب و نیفرتیمیزی بیلدیریریک.

آذربایجان تورکجه‌سی‌ عصرلر بویو اینکیشاف ائده‌رک زامان‌لاردان سوزوله-سوزوله گلمیش، کامیل بیر دیله چئوریلمیشدیر. بو اینجه و لطافتلی دیل بوتون دؤورلرده اؤز گؤزل‌لیگی و شیرینلیگی ایله دونیا دیللرینه مئیدان اوخوموشدور. بیر چوخ تانینمیش صنعتکارلار بو دیلین گؤزل‌لیگینی دویاراق اونو اؤیرنمک هوسینده اولموشلار. بؤیوک روس شاعیری م.ی.لرمونتوف قافقازدا اولارکن دوستو س.آ.رایئوسکی‌یه یازیردی کی، اوروپادا فرانسه دیلینی بیلمک نه قدر واجیبدیرسه، قافقازدا دا آذربایجان تورکجه‌سینی بیلمک او قدر ضروری‌دیر.

آذربایجان تورکجه‌سی‌ بیزیم وارلیغیمیز و ثروتیمیزدیر. اونون صافلیغینی و موقدسلیگینی قوروماق، یاد تاثیرلردن قورتارماق بیزیم بورجوموزدور. من آذربایجان اؤلکه سینده یاشاییب آذربایجان تورکجه‌سی‌نده دانیشدیغیما گؤره فخر ائدیر و یازیمی گؤرکملی شاعیریمیز نبی خزری نین شعریندن گؤتورولموش بیر بندله بیتیرمک ایسته ییرم:

اوجالیر باغچادا بولبولون سسی،

چای سوسور، اسمه‌ییر چمنده یئنه.

نه قدر دوغمادیر اونون نغمه سی

بولبول ده ائله بیر اؤتور بو دیلده.