روسیه دؤولتی‌نین دایم موحاریبه آپارماق و قان تؤکمک پسیکولوژیسی هارادان قایناقلانیر: ‌ فاکت‌لار و رقم‌لر

روسیه دؤولتی‌نین دایم موحاریبه  آپارماق و قان تؤکمک پسیکولوژیسی هارادان قایناقلانیر: ‌ فاکت‌لار و رقم‌لر 

حربی ناظیر،  پیادا قوشون‌لاری‌نین ژنرالی آ.ن.کوُروْپاتکی‌نین معروضه‌سیندن 

  1900-جو ایل 

  ایمپراتور اعلاحضرت‌لری! 

    روسیه 18 و 19-جو عصرلر عرضینده 128 ایلی موحاریبه‌لرده کئچیریب و یالنیز 72 ایل صولح ایچینده اولوب. 128 ایلدن یالنیز بئشی مودافیعه  موحاریبه‌لرینه دوشور، قالان هامیسی ایشغالچی یوروش‌لردیر.

 اعلاحضرت ایمپراتورون موعین آنلاییشی اولسون دئیه کرونولوژی شکیلده باشلاییرام:

    18-جی عصر روسیه اوچون بیر سیرا حربی وظیفه‌لرله علامتداردیر:   

• شیمالی-غربده بالتیک ساحیلینی سوئددن دؤیوشله آلماق قصدیله تزار اوچونجو ایوان و دؤردونجو ایوانین باشلادیقلاری موحاریبه‌لر سوروب.     
• غربده  لهیستانی بلاروس و اوکراینی قوپارماق قصدیله تزار آلکسئی میخایلوْویچ‌ین موباریزه‌سینی داوام ائتدیرمک.    
• جنوبدا سرحدلری قارا دنیزه دک گئنیشلندیرمک اوچون کنیاز ایسویاتوْسلاو و کنیاز اوْلِقین موعین ائتدیگی یوللا گئتمک. تورکیه‌نی دوغراماق و سونراکی ضربه‌لر اوچون اؤزول حاضیرلاماق. 
• جنوبی-شرقده گله‌جکده فیودور ایوانوْویچ و بوْریس قوْدوُنوْوون حربی تدبیرلرینی گؤرمک و خزر دنیزینی داخیلی دنیزه چئویرمک و قافقاز سیرا داغلاریندا مؤحکم‌لنمک. 
• آسیادا ایکی یؤنده - تورکوستان و ساکیت اوقیانوس ساحیل‌لری بویو سرحدلری گئنیشلندیرمک. 

  روسیه بو ایستراتژی پلان‌لاری حیاتا کئچیرمک اوچون 18-جی عصرده 19 موحاریبه  آپاریب: شیمال موحاریبه‌سی (1700-1721)، پروُت یوروشو (1711)، خیوه‌یه (1717) و چایاخارینا (1722-1724) قوشون گؤندرمک، افشاریه ‌‌ایله موحاریبه  (1725-1733)، لهیستانلا موحاریبه  (1733-1734)، رئینه یوروش (1735)، تورکیه ایله موحاریبه  (1735-1739)، سوئده قارشی حربی کامپانیا (1741-1743)، کنیاز رپنین‌ین رئینه گؤندریلمه‌سی (1748)، پروس‌ ایله موحاریبه  (1756-1762)، لهیستان ایله ساواش (1769-1772 و 1794)، تورکیه ایله موحاریبه  (1769-1774 و 1787-1791)، سوئدله موحاریبه  (1788-1790)، قاجاریه ایله موحاریبه  (1796)، فرانسه ایله موحاریبه  (1798-1800). 

  بونا داخیلی موحاریبه‌لری ده علاوه  ائتمک لازیمدیر: هشترخان عوصیانی  (1705-1706)، باشقیرد عوصیانی (1707-1709)، بوُلاوین قیامی (1707-1708)، پوُقاچوو عوصیانی (1773-1774) و دیگر خیردالاری. 

  19 موحاریبه  و یوروشدن 17-ای ایشغالچی‌لیق قصدیله آپاریلیب و یالنیز ایکیسینی مودافیعه  ساواشی آدلاندیرماق اولار. مودافیعه‌یه 2 ایل و 5 آی، تجاووزه 66 ایل و 1 آی صرف اولونوب. موحاریبه  آتشی روسیه اراضی‌سینده 3 ایل یاریم توغیان ائدیب، سیلاحلی کامپانیالارین 65 ایلی دوشمن اراضی‌سینه کئچیریلیب. 

  روسیه 19-جو عصرده 15 خاریجی و 3 داخیلی موحاریبه  آپاریب. خاریجی موحاریبه‌لر 67 ایلدن چوخ چکیب. 32 ایل و 9 آی صولح دؤورونه دوشور. فاصیله‌سیز دؤیوش‌لرین 67 ایلینده مودافیعه  دؤیوش‌لری 2 ایل و بیر آی چکیب. قالانی - 121 حربی عملیات ایمپراتورلوقدان قیراقدا باش وئریب. 

  18-جی عصرین اولینده جمعی 12 میلیون اهالیسی اولان روسیه 200 ایل‌لیک موحاریبه  دؤورونده ایندیکی 1900-جو ایلده اهالیسی 132 میلیون نفر اولان دؤولته چئوریلیب. 

ترجومه Strateq.az-یندیر

 کؤچورن:‌عباس ائلچین